Doha
श्रीगुरु चरन सरोज रज, निज मनु मुकुरु सुधारि।
Shrī Guru Charan Saroj Raj, Nij Manu Mukuru Sudhāri.
बरनउँ रघुबर बिमल जसु, जो दायकु फल चारि॥
Baranau Raghubar Bimal Jasu, Jo Dāyaku Phal Chāri.
बुद्धिहीन तनु जानिके, सुमिरौं पवन कुमार।
Buddhihīn Tanu Jānike, Sumirau Pavan Kumār.
बल बुद्धि बिद्या देहु मोहिं, हरहु कलेस बिकार॥
Bal Buddhi Vidyā Dehu Mohi, Harahu Kales Vikār.
जय हनुमान ज्ञान गुन सागर।
Jai Hanumān Gyān Gun Sāgar,
जय कपीस तिहुँ लोक उजागर॥
Jai Kapīs Tihu Lok Ujāgar.
राम दूत अतुलित बल धामा।
Rām Dūt Atulit Bal Dhāmā,
अंजनि पुत्र पवनसुत नामा॥
Anjani-putra Pavansut Nāmā.
महाबीर बिक्रम बजरंगी।
Mahābīr Bikram Bajrangī,
कुमति निवार सुमति के संगी॥
Kumati Nivār Sumati Ke Sangī.
कंचन बरन बिराज सुबेसा।
Kanchan Baran Birāj Subesā,
कानन कुंडल कुंचित केसा॥
Kānan Kundal Kunchit Kesā.
हाथ बज्र औ ध्वजा बिराजै।
Hāth Bajra Au Dhwajā Birājai,
काँधे मूँज जनेऊ साजै॥
Kāndhe Mūnj Janeū Sājai.
संकर सुवन केसरी नंदन।
Sankar Suvan Kesarī Nandan,
तेज प्रताप महा जग बंदन॥
Tej Pratāp Mahā Jag Bandan.
बिद्यावान गुनी अति चातुर।
Vidyāvān Gunī Ati Chātur,
राम काज करिबे को आतुर॥
Rām Kāj Karibe Ko Ātur.
प्रभु चरित्र सुनिबे को रसिया।
Prabhu Charitra Sunibe Ko Rasiyā,
राम लखन सीता मन बसिया॥
Rām Lakhan Sītā Man Basiyā.
सूक्ष्म रूप धरि सियहिं दिखावा।
Sūkshma Rūp Dhari Siyahi Dikhāvā,
बिकट रूप धरि लंक जरावा॥
Bikat Rūp Dhari Lank Jarāvā.
भीम रूप धरि असुर सँहारे।
Bhīm Rūp Dhari Asur Sanhāre,
रामचंद्र के काज सँवारे॥
Rāmchandra Ke Kāj Sanvāre.
लाय सजीवन लखन जियाये।
Lāy Sajīvan Lakhan Jiyāye,
श्रीरघुबीर हरषि उर लाये॥
Shrī Raghubīr Harashi Ur Lāye.
रघुपति कीन्ही बहुत बड़ाई।
Raghupati Kīnhī Bahut Badāī,
तुम मम प्रिय भरतहि सम भाई॥
Tum Mam Priya Bharatahi Sam Bhāī.
सहस बदन तुम्हरो जस गावैं।
Sahas Badan Tumharo Jas Gāvai,
अस कहि श्रीपति कंठ लगावैं॥
As Kahi Shrīpati Kanth Lagāvai.
सनकादिक ब्रह्मादि मुनीसा।
Sanakādik Brahmādi Munīsā,
नारद सारद सहित अहीसा॥
Nārad Sārad Sahit Ahīsā.
जम कुबेर दिगपाल जहाँ ते।
Jam Kuber Digpāl Jahā Te,
कबि कोबिद कहि सके कहाँ ते॥
Kabi Kobid Kahi Sake Kahā Te.
तुम उपकार सुग्रीवहिं कीन्हा।
Tum Upkār Sugrīvahi Kīnhā,
राम मिलाय राज पद दीन्हा॥
Rām Milāy Rāj Pad Dīnhā.
तुम्हरो मंत्र बिभीषन माना।
Tumharo Mantra Bibhīshan Mānā,
लंकेस्वर भए सब जग जाना॥
Lankeswar Bhae Sab Jag Jānā.
जुग सहस्र जोजन पर भानू।
Jug Sahasra Jojan Par Bhānū,
लील्यो ताहि मधुर फल जानू॥
Līlyo Tāhi Madhur Phal Jānū.
प्रभु मुद्रिका मेलि मुख माहीं।
Prabhu Mudrikā Meli Mukh Māhī,
जलधि लाँघि गये अचरज नाहीं॥
Jaladhi Lānghi Gaye Acharaj Nāhī.
दुर्गम काज जगत के जेते।
Durgam Kāj Jagat Ke Jete,
सुगम अनुग्रह तुम्हरे तेते॥
Sugam Anugraha Tumhare Tete.
राम दुआरे तुम रखवारे।
Rām Duāre Tum Rakhvāre,
होत न आज्ञा बिनु पैसारे॥
Hot Na Āgyā Binu Paisāre.
सब सुख लहै तुम्हारी सरना।
Sab Sukh Lahai Tumhārī Sarnā,
तुम रच्छक काहू को डर ना॥
Tum Rachchhak Kāhū Ko Dar Nā.
आपन तेज सम्हारो आपै।
Āpan Tej Samhāro Āpai,
तीनों लोक हाँक तें काँपै॥
Tīnon Lok Hānk Te Kānpai.
भूत पिसाच निकट नहिं आवै।
Bhūt Pisāch Nikat Nahi Āvai,
महाबीर जब नाम सुनावै॥
Mahābīr Jab Nām Sunāvai.
नासै रोग हरै सब पीरा।
Nāsai Rog Harai Sab Pīrā,
जपत निरंतर हनुमत बीरा॥
Japat Nirantar Hanumat Bīrā.
संकट तें हनुमान छुड़ावै।
Sankat Te Hanumān Chhudāvai,
मन क्रम बचन ध्यान जो लावै॥
Man Kram Bachan Dhyān Jo Lāvai.
सब पर राम तपस्वी राजा।
Sab Par Rām Tapasvī Rājā,
तिन के काज सकल तुम साजा॥
Tin Ke Kāj Sakal Tum Sājā.
और मनोरथ जो कोई लावै।
Aur Manorath Jo Koī Lāvai,
सोइ अमित जीवन फल पावै॥
Soi Amit Jīvan Phal Pāvai.
चारों जुग परताप तुम्हारा।
Chāron Jug Partāp Tumhārā,
है परसिद्ध जगत उजियारा॥
Hai Parsiddh Jagat Ujiyārā.
साधु संत के तुम रखवारे।
Sādhu Sant Ke Tum Rakhvāre,
असुर निकंदन राम दुलारे॥
Asur Nikandan Rām Dulāre.
अष्ट सिद्धि नौ निधि के दाता।
Ashta Siddhi Nau Nidhi Ke Dātā,
अस बर दीन्ह जानकी माता॥
As Bar Dīnh Jānkī Mātā.
राम रसायन तुम्हरे पासा।
Rām Rasāyan Tumhare Pāsā,
सदा रहो रघुपति के दासा॥
Sadā Raho Raghupati Ke Dāsā.
तुम्हरे भजन राम को पावै।
Tumhare Bhajan Rām Ko Pāvai,
जनम जनम के दुख बिसरावै॥
Janam Janam Ke Dukh Bisrāvai.
अंत काल रघुबर पुर जाई।
Anta Kāl Raghubar Pur Jāī,
जहाँ जन्म हरि भक्त कहाई॥
Jahā Janm Hari Bhakt Kahāī.
और देवता चित्त न धरई।
Aur Devtā Chitt Na Dharaī,
हनुमत सेइ सर्ब सुख करई॥
Hanumat Sei Sarb Sukh Karaī.
संकट कटै मिटै सब पीरा।
Sankat Katai Mitai Sab Pīrā,
जो सुमिरै हनुमत बलबीरा॥
Jo Sumirai Hanumat Balbīrā.
जय जय जय हनुमान गोसाईं।
Jai Jai Jai Hanumān Gosāī,
कृपा करहु गुरुदेव की नाईं॥
Kripā Karahu Gurudev Kī Nāī.
जो सत बार पाठ कर कोई।
Jo Sat Bār Pāth Kar Koī,
छूटहि बंदि महा सुख होई॥
Chhūtahi Bandi Mahā Sukh Hoī.
जो यह पढ़ै हनुमान चालीसा।
Jo Yah Padhai Hanumān Chālīsā,
होय सिद्धि साखी गौरीसा॥
Hoy Siddhi Sākhī Gaurīsā.
तुलसीदास सदा हरि चेरा।
Tulsīdās Sadā Hari Cherā,
कीजै नाथ हृदय महँ डेरा॥
Kījai Nāth Hriday Mah Derā.
Doha
पवनतनय संकट हरन, मंगल मूरति रूप।
Pavantanay Sankat Haran, Mangal Mūrti Rūp.
राम लखन सीता सहित, हृदय बसहु सुर भूप॥
Rām Lakhan Sītā Sahit, Hriday Basahu Sur Bhūp.